|
دنيــــا
دنيا..
رمتني بقوتها في بحور الغرام..
رمتني بين زهور الجناين.. ونستني الكلام.
وكل الشعر اللي كنت باكتبه بالاقلام..
رسمت مكانه قلب! أصحى جنبه و انام!
دنيا..
كنت فاكرها صعبه ومره كل زمان..
بس طلعت سهله للي يمشي على حبالها بأمان…
دي حتى طلعت ناويلنا الخير في كل مكان!
وطلع الشر منك انت.. يا إنسان!!
دنيا..
الناس فيها عايشين لغايه..
عمر ماحد بص لغيره.. وساعده في حلمه.. دي تبقى حكايه!!
واللي يساعد غيره في الزمن ده يبقى عنده قلة خبره ودرايه!
زمنك يا دنيا! الطيبة فيه بقت مجرد رواية!
دنيا..
عاملونا فيها الناس على اننا عيال..
وبصوا لأحلامنا .. وقالولنا مالهاش في دنيانا مجال!!
قال يعني يا كبار .. أحلامكم في الدنيا هي الجبال!!
ما الحال من بعضوا .. بس عايزين تأمروا!! ومش لاقيين غيرنا تربطوه بالحبال!
دنيا..
متسواش منا نديها دموع!
والثقة في ناسها واجب.. رغم ان البشر من ألف نوع ونوع..
وطول ما انت فاكر ان الحزن دايم حتعيش في ذل وخضوع!!
وحتعيش فاهم الدنيا غلط!! وفي أحزانك حتفضل مخدوع..
دنيا..
عملت مني ومن حبيبتي شمس وقمر..
وحضنتنا بدفاها في ليالي السهر..
ولمست قلوبنا بحنيه.. رضينا فيها بالقدر..
وقلنا سلمنا وحبينا.. وطرنا من شجر لشجر!
دنيا ..
بعت فيها كل حاجة واشتريت حبيبتي..
ووقفت قدام العالم.. وشهدوا انها عشيقتي..
ومش حرضى تفارقني يوم.. وتسيبني غارق في حيرتي!!
دنا مليش غيرها في الدنيا.. ملك إيديها وهي أميرتي..
دنيا!!
حبيبتي.. كلمه منك و أفرش بالنجوم أراضيكي..
وابعت للقمر.. يهجر الدنيا وينور لياليكي..
ده أنا لو عندي أغلى من روحي .. بيه أفديكي!!
بدلالك … وجمالك.. لو نزلت على خدودك دموع.. بعيوني أراضيكي!
دنيا..
بعتت لنا ريشه واحنا قاعدين..
لمست الريشه ايديه .. ولمسه ايديها.. وبصينا لبعض واحنا ساكتين..
وعرفنا ان ده مستقبلنا.. وحبنا هيدوم سنين و سنين..
وقلنا لقلوبنا ارقصي.. وطيري .. واعملي بدل الفرح اتنين!
دنيا..
كل ناسها بصولي لما قلتلهم حبيت
كأني عملت مصيبة.. أو كأني في نظرهم اتجنيت!!
بس حبيبتي في ايدي.. وقدام الدنيا! هيا ضحكت.. وانا غنيب!
ودنيا مش هتقف في وشي.. ومحدش هيمنعني .. لو أنا نويت!!
* * *
|
