|
بحلم..
بحلم بليلة
ف مصر
ليلة بحلم النصر
تفرح بلادنا بنصر
وتفرح قلوبنا بنصر
مش فيلا ف مدينة نصر!!
بحلم بيوم
نلقاه
نصحى بخبر معناه
بلادنا يا ناس حره
والخاين هزمناه!!
بحلم
بلحظة نقول
الأرض دي حرة
وأمتنا دي حرة
وبلادنا عالم أول..
وخدنا بتار الدرة!!
بحلم بلحظة حب
نعيشها ف بلادنا
بين أهلي و ولادنا
مش مرعوبين م الضرب!
بحلم ومش
هتنازل
عن حلمي طول العمر
لبلادنا تتحرر
وعقولنا تتحرر
ولسه يا قلبي الصبر!
بحلم بحب
كبير ..
يفضل في قلبي أسير
ياخد لبكرة أمانة..
بسمة و قلوب فرحانة
مش قلب متألم
من غدر وخيانة
بحلم
حبيبتي الاقيكي
مابين شفايفي النغم
وقدام عنيا الضي
ولا جرح يوم ولا ندم
وتبقيلي عمري الجاي!
بحلم
حبيبتي نكون
كلمة و حكاية حب
يسمع غنانا الكون
ويسمع أماني القلب
بحلم حبيبتي نكون
انا وانتي شمس و قمر
نلمس نسايم الليل
ونعيش ليالي السهر
بحلم ببيت
يكبر حياتنا سوا
نزرع جناين العشق
ونقطف حلاوة الهوا
بحلم ببنت
جميلة
أسميها حرية
أربيها فـ أحضاني
و اخبيها فـ عنيا
بحلم أشوف
أيامي
قدامي أغنيه
مكتوبة بلون الحب
وخطوطها مصرية
بحلم بيوم
ما يكون
ملاكي جنبيا
تلمس ايديها ايديا
وتقرا اللي في عنيا
بحلم أكون
مجنون
بعيونك انت حبيبي
فيهم اشوف الكون
و فيهم اشوف نصيبي
بحلم
بليلة أنام
وبكرة مش همي
وكل حياتنا سلام
والكل بيغني
بحلم بحب
حقيقي
مش حب أفلام
ينفع حكاية حب
مش شخبطة أقلام!
بحلم كتير
وكتير
وتعبني التفكير
ومدام الحلم حلم
يبقى الرب في التدبير!!!!
* * |
